मदरल्याण्डमा रक्तदान

पोखरा, २६ भदौ। तीज अवसरमा युवा रेडक्रस सर्कल मदरल्याण्ड माविको आयोजनामा रक्तदान कार्यक्रम भएको छ । कार्यक्रममा ४९ युनिट रगत संकलन भयो ।

प्रमुख अतिथि नेपाल रेडक्रस सोसाइटी कास्की शाखाका उपसभापति तथा क्षेत्रीय रक्तसञ्चार केन्द्र प्रमुख डण्डराज शर्माले विद्यार्थी तथा पहिलो रक्तदाता आभाष सिग्देललाई ब्लडव्याग हस्तान्तरण गरी उद्घाटन गरेका थिए ।

प्रमुख अतिथि डण्डराज शर्माले विद्यालयले रक्तदानजस्तो पवित्र कार्यक्रम गरेकोमा धन्यवाद दिए । उनले यसप्रकारका कार्यक्रमले रगत अभावमा ज्यान गुमाउनुपर्ने अवस्था नआउने बताए ।

युरेस मदरल्याण्ड सचिव निवेदिता अधिकारीले स्वागत मन्तव्य राखेको यस कार्यक्रममा विद्यालय निर्देशक तथा युरेस संरक्षक त्रिभुवन शर्मा, नेपाल रेडक्रस सोसाइटी उपशाखा ७ का सभापति दामु बराल, नेरेसो जिल्ला शाखा सदस्य बलराम आचार्य लगायतले बोलेका थिए।

युरेस मदरल्याण्डका अध्यक्ष रिजन ज्यौपानेको अध्यक्षतामा सम्पन्न कार्यक्रमको सञ्चालन शिक्षक नायक रोशन थापाले गरेका थिए।

- अादर्श समाज सम्वाददाता