हेलिकोप्टर दुर्घटनामा ६ को मृत्यु

काठमाडौं, २३ भदौ। गोरखा सामागाउँबाट यात्रु लिएर काठमाडौँ र्फकदै गरेको अल्टिच्युड एयरलाइन्सको हेलिकोप्टर शनिवार नुवाकोटको मेघाङ गाउँपालिकामा दुर्घटना हुँदा ६ जनाको मृत्यु भएको छ ।

हेलिकोप्टरमा सवार ७ मध्ये १ जनामात्र जिवित छन् । उनी आनी डोल्मा हुन । दुर्घटनामा मृत्यु हुनेमा हेलिकोप्टरका पाइलट निश्चल केसी, जापानी नागरिक हिरोमी कोमात्सु, रामेछापका ४० वर्षीय दिल्लीबहादुर गुरुङ, दोलखाका ३७ वर्षीया हीरा शेर्पा, गोरखाको चुमनुब्री गाउँपालिका-१ का छोवाङ नुर्वु र सिन्धुपाल्चोकका २२ वर्षीय सुनिल तामाङ छन् ।

घाइते आनीको मेडिसिटी अस्पताल ललिपुरमा उपचार भइरहेको छ । प्रतिकुल मौसमका कारण शव आइतबार बिहानमात्र काठमाडौँ ल्याइने भएको छ ।

घटनास्थलबाट शव सङ्कलन गरी उद्धारमा गएको हेलिकप्टर अवतरण भएको स्थानसम्म ल्याइसकिएको र मौसमले साथ दिए आइतबार बिहान हेलिकप्टरमार्फत शव काठमाडौँ ल्याइने त्रिभुवन अन्तर्राष्ट्रिय विमानस्थलका महाप्रबन्धक राजकुमार क्षेत्रीले जानकारी दिए ।

- रासस