आहा गोल्डकपबाट २४ लाख बचत

पोखरा, ९ भदौ । १६ औं आहा रारा गोल्ड कप फुटबल प्रतियोगिताबाट २३ लाख ७६ हजार रुपैयाँ बचत भएको सहारा क्लब पोखराले जनाएको छ ।

शनिबार आयव्यय सार्वजनिक गर्दै अर्थ संकलन उपसमितिका संयोजक टीकाबहादुर कार्कीले खेलाडी दैनिक भत्तामा मात्रै २८ लाख २२ हजार खर्च भएको बताए । उनले ग्राउण्ड स्टेज र प्यारापिट निर्माणका लागि ६ लाख ३६ हजार रुपैयाँ खर्च भएको बताए ।

संयोजक कार्कीले पुरस्कार वापतको यो वर्षको कर तिर्न भने बाँकी रहेको बताए । उनले खर्च भएको रकममा यातायातमा १ लाख ३८ हजार, अतिथि सत्कारमा २ लाख ६ हजार, फोटो प|mेम तथा मायाको चिनोमा १ लाख ६२ हजार, मञ्च व्यवस्थापनमा १ लाख ३० हजार र व्यानर कपडा तथा लेखाइ खर्च वापत १ लाख ४१ हजार खर्च भएको जानकारी दिए । १६ औं आहा रारालाई १३ लाख ५० हजार रुपैयाँ मुख्य प्रायोजक रारा चाउचाउले प्रदान गरेको थियो भने राष्ट्रिय खेलकुद परिषदले ५ लाख, गोर्खा ब्रुअरीले ३ लाख ५० हजार आर्थिक सहयोग प्रदान गरेको थियो । यस्तै, सहारा क्लब अष्टे्रलियाले दोश्रो पुस्कार बापत २ लाख ५१ हजार, लुम्बिनी विकास बैंक, पृथ्वीराजमार्ग बस सञ्चालक समितिले १ लाख ५० हजार सहयोग दिएका थिए ।

सहारा हङकङले १ लाख २६ हजार तथा रोयल र नेपाल पर्यटन बोर्डले ७५/७५ हजार रुपैयाँ सहयोग गरेका थिए ।

क्लब अध्यक्ष केशवबहादुर थापाको अध्यक्षतामा भएको कार्यक्रममा मुख्य प्रायोजक आहा रारा चाउचाउ उत्पादन संस्था हिमश्री फुड्सका अध्यक्ष समेत रहेका सांसद सूर्यबहादुर केसीले बोलेका थिए ।

क्लबले गत वर्ष माघ ९ देखि २० सम्म पोखरा रंगशालामा सो प्रतियोगिता गरेको थियो ।

- एजेन्सी