लाम्पाटा क्षेत्रको गाँजा नष्ट

हेमजा, १६ साउन।पोखरा-२५, हेमजा स्थित लाम्पाटा क्षेत्रको हरियो गाँजा बुधवार नष्ट गरिएको छ।

सामुदायिक सेवा तथा सामुदायिक प्रहरी सेवा केन्द्र हेमजाको आयोजनामा भएको सो कार्यक्रममा वडा प्रहरी कार्यालय बगर, टोल विकास समन्वय समिति हेमजा तथा लाम्पाटा स्थित सुनौलो टोल विकास संस्थाले सघाएका थिए। सो अवसरमा संकलित करिब २ क्वीन्टल गाँजा जलाएर नष्ट गरिएको छ।

सामुदायिक प्रहरी सेवा केन्द्र हेमजाकी अध्यक्ष बिष्णु बास्तोलाले सामुदायिकले समाजलाई प्रत्यक्ष सकारात्मक प्रभाव पार्ने खालका कार्यक्रम गर्दै आइरहेको चर्चा गर्दै त्यसैको एक अशंका रुपमा गाँजा नष्ट गरिएको भनाइ राखिन्।

उनले गाँजा फडानीबाट स्थानीय युवाहरुले समेत पाठ सिक्नुपर्ने तर्क गर्दै समाजका कुरीति प्रशय दिने छुट कसैलाई पनि नभएको औँल्याइन्।

सुनौलो टोल विकास संस्थाका अध्यक्ष सम्झना थापाले सो क्षेत्रमा गाँजा सारिएको नभई आफै उम्रिएको जानकारी दिँदै गाँजा फडानी गरी नष्ट गर्ने कार्य अत्यन्तै सराहनीय रहेको चर्चा गरिन्।उनले कतिपय अवस्थामा गाँजाकै कारण स्थानीयको घरमा कलह हुने गरेको स्मरण पनि गरेकी थिइन्।

कार्यक्रम सामुदायिक प्रहरी सेवा केन्द्र हेमजाकी अध्यक्ष बास्तोलाको अध्यक्षतामा भएको थियो।

- अादर्श समाज सम्वाददाता