शिविरमा पाँच सयको आँखा जाँच

हेमजा, ३० फागुन। ज्येष्ठ नागरिक समिति हेमजा तथा हेमजा भूपू सैनिक कृषि सहकारी संस्थाको संयुक्त आयोजनामा मंगलबार निःशुल्क आँखा परीक्षण शिविर सम्पन्न भएको छ।

हिमालय आँखा अस्पताल पोखराको प्राविधिक सहयोग तथा पोखरा लेखनाथ महानगरपालिकाको आर्थिक सहयोगमा भएको उक्त शिविरमा ५ सय ५ जनाको आँखा परीक्षण गरिएको थियो। जसमध्ये ४१ जनामा मोतियाबिन्दुको समस्या भेटिएको हिमालय आँखा अस्पतालका नेत्र सहायक शशिकला लामिछानेले जानकारी दिइन्।शिविरको वडा अध्यक्ष शोभाकर तिम्सिनाले उद्घाटन गरेका हुन्। आफूहरुले ज्येष्ठ नागरिकमा आँखासम्बन्धी रोग अत्यधिक हुने भएकाले उनीहरुलाई लक्षित गरी शिविर सञ्चालन गरेको ज्येष्ठ नागरिक समिति हेमजाका अध्यक्ष नीलकण्ठ पौडेलले बताए।

शिविरमा हिमालय आँखा अस्पतालका नेत्र सहायक शशिकला लामिछानेको नेतृत्वमा वीरेन्द्र सैनिक अस्पताल काठमाडौंका प्राडा राम श्रेष्ठ, मे टेकबहादुर कुँवर, श्यामबहादुर कुँवर, एकबहादुर कुँवर, सीताराम थापा लगायतको टोली खटिएको थियो।

- अादर्श समाज सम्वाददाता