मनाङ तिल्चे गाउँमा पहिलो पटक गाडी

लमजुङ, १९ पुस। मनाङको चित्ले गाउँमा पहिलो पटक गाडी पुग्दा स्थानीयले खुशीयाली मनाएका छन्।

मनास्लु पदमार्गअन्तर्गत पर्ने तिल्चे गाउँमा दूधखोलाको किनार किनारै निर्माण गरिएको सडकबाट गाडी तिल्चे गाउँ पुर्‍याइएको हो।

मनाङमा मोटर पुगेको ५ वर्ष बितिसकेको भए पनि जिल्लाका पुराना नेता कोमल घलेको जन्म तथा हालको कर्म गाउँ समेत रहेको तिल्चेमा अहिलेसम्म गाडी पुगेको थिएन।

लमजुङतर्फबाट जाँदा मनाङको प्रवेश नाका नासोङ गाउँपालिका-६ र ७ अन्तर्गत पर्ने तिल्चेमा यात्रुसहितको जीप गाउँ पुग्दा स्थानीयले खुशीयाली मनाएको सुपर भ्यू होटलका संचालक पुष्प गुरुङले जानकारी दिए। गाउँलेले फूलमालासहित गाडीको स्वागत गरेका थिए। त्यस्तै, स्थानीयले नाचगानसहित खुशीयाली मनाएको स्थानीय शिक्षक एवं समाजसेवी चेकमान गुरुङले बताए।

गाडी पुर्‍याउन सहयोग गरेकोमा पूर्व श्रम तथा रोजगार राज्यमन्त्री टेकबहादुर गुरुङलाई स्थानीयले धन्यवाद समेत दिए। पूर्वमन्त्री गुरुङले संसद् विकास कोष र निर्वाचन क्षेत्र पूर्वाधार कोष अन्तर्गत उक्त सडकको लागि रकम विनियोजन गरेका थिए।

हाल दूधखोला तारेर मात्रै सवारीसाधन आवतजावत गर्ने गर्दछन्। दूधखोलामा मोटरेवल पुल निर्माण थालिएको २ वर्ष बितिसक्दा पनि पुलको फाउन्डेसन समेत निर्माण हुन सकेको छैन।

- अादर्श समाज सम्वाददाता