इपिएलको उपाधि विराटनगरलाई

काठमाडौँ, १५ पुस। भैरहवा ग्लाडिर्एर्टसमाथि एक रनको रोमाञ्चक जित हात पार्दै विराटनगर वारिर्यर्सले एभरेस्ट प्रिमियर लिग (इपिएल) क्रिकेटको उपाधि जितेको छ।

त्रिवि कीर्तिपुरको खेल मैदानमा शनिबार सम्पन्न खेलमा पारस खड्काको कप्तानीमा रहेको विराटनगर वारिर्यर्सले टस जितेर पहिलो ब्याटिङ गर्दै २० ओभरमा ७ विकेट गुमाएर १ सय ४९ रनको योगफल खडा गरेको थियो।

एकसय ५० रनको विजय लक्ष्यका साथ मैदान उत्रेको शरद भेषवाकरको कप्तानीमा खेलिरहेको भैरहवा ग्लाडियर्टसले निर्धारित २० ओभरमा ९ विकेट गुमाउँदै १ सय ४८ रन मात्र बनाउन सक्यो।

क्रिकेट खेलको एकै ओभरले हार जित दिलाउँछ भन्ने उक्ति शनिबारको त्रिवि खेल मैदानमा प्रमाणित भएको छ। १८ औं ओभरसम्म आफ्नो नियन्त्रण राखेको खेलको अन्तिम २ ओभरमा टिक्न नसक्दा भैरहवा जितबाट विमुख भयो। अन्तिम दुर्इ ओभरमा मात्र भैरहवाले ५ विकेट गुमाएको थियो। एक सय ५० रनको लक्ष्य पछ्याएको भैरहवाले शुरुवातमा निकै राम्रो गरेको थियो। आठौँ ओभरमा अंशुमान रथले ३६ रन दिएपछि खेल भैरहवाको पक्षमा गएको मानिएको थियो। तर १५औँ ओभरको पहिलो बलमै भैरहवाका कप्तान शरद रन आउट हुन पुगे। त्यसपछि विराटनगर खेलमा फर्कियो। यद्यपि अन्तिम २ ओभर मात्र ११ रन चाहिएको थियो र भैरहवाको जितको सम्भावना कायमै थियो। तर, कप्तान पारस खड्काले १९औँ ओभरको २ रन दिएर २ विकेट लिएपछि भैरहवालाई अन्तिम ओभरमा ९ रन चाहियो।

अन्तिम ओभरमा अनिल साहको पहिलो बलमै कृष्ण कार्कीले चौका हान्दै जितको आशा कायम राखे पनि दोस्रो बलमा उनी आउट भए। निकै रोमाञ्चक बनेको अन्तिम ओभरको तेस्रो बलमा रन नै थिएनन्। चौथो बलमा भुवन कार्की रन आउट भए भने पाँचौँ बलमा पुनित मिश्रको विकेट गुम्यो।

अन्तिम बलमा भैरहवालाई जितका लागि ५ रन चाहियो तर ३ रन मात्र जोड्न सक्यो र एक रनको नाटकीय जित निकाल्दै विराटनगर च्याम्पियन बन्यो।

यसअघि विराटनगरका लागि अंशुमन रथले ४१, कप्तान खड्काले २७, हरिशंकर शाहले २२ तथा प्रनित थापा मगरले १४ तथा करण केसीले नौ रन बनाएका थिए।

शुरुवातमा राम्रो प्रदर्शन गरे पनि पछिल्ला क्रमका ब्याट्सम्यानहरू सस्तैमा आउट भएपछि विराटनगरले मध्यम योगफल तयार पारेको हो।

भैरहवाका लागि पुनित मिश्र र कृष्ण कार्कीले दुर्इ/दुर्इ तथा शरद भेषवाकर र आरिफ शेखले एक/एक विकेट लिए।

यो प्रतियोगितामा पारस खड्काको टिम विराटनगरसँग शरद भेषावकरको भैरहवाको तेस्रो हार हो। भैरहवा समूह चरण र पहिलो क्वालिफायरमा पनि हारेको थियो।

‘म्यान अफ द फाइनल’ विराटनगरका कप्तान खड्का नै चुनिए।

- रासस