आगलागीले २२ विद्यार्थी र दुर्इ शिक्षकको मृत्यु

कवालालम्पुर, २९ भदौ । मलेसियाको एक धार्मिक विद्यालयमा बिहीबार बिहान भएको आगलागीमा परी कम्तीमा पनि २४ व्यक्तिको मृत्यु भएको समाचार छ ।

यस आगलागीमा परी २२ जना विद्यार्थी र दुर्इ जना शिक्षकको मृत्यु भएको प्रहरीले जानकारी दिएको छ । उक्त विद्यालय बालकका लागि मात्र हो ।

यस आगलागीमा परी मृत्यु भएका व्यक्तिमा अधिकांश १३ देखि १७ वर्षका रहेका जनाइएको छ । अधिकारीहरुका अनुसार केही वर्षयता भएका भीषण आगलागीमध्ये यो हो ।

आगलागी बिहीबार बिहानको मिर्मिरेपूर्व नै भएको थियो । त्यस समयमा बालकहरु सुतिरहेको अनुमान गरिएको छ ।

बिहानीको हिँर्डाई (मर्निङ वाक)का लागि नागरिक सडकमा गएका बेला उक्त विद्यालयको माथिल्लो तलामा आगोको मुस्लो निस्किएको देखेका थिए ।

साथै बालकहरुले भित्रबाट बचाउ बचाउ भन्दै रोइरहेको आवाज पनि उनीहरुले सुनेका थिए । त्यसपछि उनीहरुले नै प्रहरी र दमकललाई खबर गरेको बताइएको छ ।  मलेसियाको राजधानी क्वालालम्पुरको मध्यभागमा रहेको इस्लामिक धार्मिक विद्यालय ताहफिजमा बिहीबार बिहानै आगलागी शुरु भएको थियो ।

स्थानीय टेलिभिजनले देखाएका दृश्यमा आगलागीको कारण ठूलो धुवाँको मुस्लो र खरानी उडेको तथा सो विद्यालयबाट किशोरहरु भाग्ने कोशिस गरिरहेका र भागेका देखिन्छ । क्वालालम्पुरका प्रहरी प्रमुख अमर सिंहका अनुसार सो आगलागीमा परी मृत्यु भएका व्यक्तिको शरीर पूरै जलेको थियो । दुर्भाग्यबस यस विद्यालयमा एउटै मात्र प्रवेशद्धार रहेको र सबै शवहरु एकको माथि अर्को गरी त्यहीँ थुप्रिएको दृश्य पनि टेलिभिजनहरुले देखाएका छन् ।

मलेसियाको आगलागी उद्धार विभागका निर्देशक खिरुदिन ड्राहम्यानले एएफपी समाचार समितिलाई दिएको जानकारीअनुुसार यो यस देशको २० वर्षयताको सबैभन्दा भीषण आगलागी हो ।

प्रहरीले आगलागीको कारणबारे अनुसन्धान सुरु गरेको छ । प्रहरीको प्रारम्भिक अनुमानमा उक्त विद्यालय भवनमा विद्युतीय गडबडीबाट आगो निस्किएको पाइएको जनाइएको छ ।

- रासस/एएफपी